मुंबई : फेब्रुवारी महिन्याच्या अखेरीसच तापमानाने सरासरी ओलांडल्याने आता मार्च महिन्यातही मुंबईकरांना तीव्र उष्णतेचा सामना करावा लागणार आहे. हवामान खात्याच्या अंदाजानुसार, मार्च ते मे दरम्यान कमाल आणि किमान तापमान सरासरीपेक्षा जास्त राहणार असून, उष्णतेच्या लाटांची (Heatwave) संख्या आणि तीव्रता अधिक असण्याची शक्यता आहे.
रविवारी कुलाबा हवामान केंद्रात कमाल तापमान 32.8 अंश सेल्सिअस तर सांताक्रूझ केंद्रात 35.1 अंश सेल्सिअस नोंदवले गेले. कमाल तापमानात किरकोळ घट झाली असली तरी, पुढील काही दिवसांत तापमान वाढीचा अंदाज आहे. काही काळ ढगाळ हवामान राहू शकते, मात्र सरासरी तापमान 33 ते 35 अंश सेल्सिअस दरम्यान राहण्याची शक्यता हवामान विभागाने वर्तवली आहे. मार्चच्या अखेरीस तापमान आणखी वाढू शकते.
देशभरात यंदाचा फेब्रुवारी महिना विक्रमी उष्ण ठरला. 1901 पासूनच्या हवामानाच्या नोंदी पाहता, 2025 चा फेब्रुवारी हा सर्वाधिक तापमान असलेला महिना ठरला आहे. याआधी जानेवारी महिनाही उष्णतेच्या दृष्टीने उच्चांक गाठणारा ठरला होता. जानेवारी 2025 मध्ये देशाचे सरासरी तापमान 18.98 अंश सेल्सिअस होते, जे 1901 नंतरचे तिसरे सर्वोच्च तापमान होते.
हवामानातील बदल आणि वाढत्या उष्णतेमुळे नागरिकांनी आवश्यक काळजी घेण्याचे आवाहन तज्ज्ञांनी केले आहे. विशेषतः लहान मुले, वृद्ध आणि आरोग्यविषयक समस्या असलेल्या नागरिकांनी उष्णतेपासून बचाव करण्यासाठी सावधगिरी बाळगावी.
महत्त्वाच्या टिप्स:
- शक्यतो उन्हाळ्यात दुपारी 12 ते 4 या वेळेत घराबाहेर जाणे टाळावे.
- पुरेसे पाणी प्या आणि शरीराला हायड्रेट ठेवा.
- हलके, सुती कपडे वापरा आणि डोके व चेहरा झाकण्यासाठी स्कार्फ किंवा टोपीचा वापर करा.
- गरम व तळलेले पदार्थ कमी करून फळे आणि पाणीयुक्त आहार घ्या.
मुंबई आणि संपूर्ण देशात वाढत्या तापमानाच्या पार्श्वभूमीवर नागरिकांनी उष्णतेच्या लाटेपासून स्वतःचे संरक्षण करण्यासाठी खबरदारी घेणे अत्यंत आवश्यक आहे.
No comments:
Post a Comment